شاه داغیم چال پاپاغیم ائل دایاغیم شانلی سهندیم
باشی طوفانلی سهندیم
باشدا حیدر بابا تک قارلا قیروولا قاریشیبسان
سون ایپک تئللی بولودلارلا سماده ساریشیبسان
ساواشیرکن باریشیبسان
گوید ه ن ایلهام آلالی سیری سماواته دئیر سه ن
هله آغ کورکو بورون یازدا یاشئل دوندا گئیه ر سن
قورادان حالوا یئیه رسن
دوشلرینده سونالار سینه سی تک شوخ ممه لر ده
نه شیرین چشمه لرین وار
او یاشئل تئللری یئل هورمه ده آینالی سحرده
عشوه لی ائشمه لرین وار
قوی یاغیش یاغسادا یاغسین
سئل اولوب آخسادا آخسین
یانلاریندا دره لر وار
قوی قلم قاشلارین اوچسون فره لر له خامی باخسین
باشلاریندا هئره لر وار
سیلدیریملار سره لر وار
او اتک لر ده نه قیز لار یاناغی لاله لرین وار
قوزولار اوتلایاراق نی ده نه خوش ناله لرین وار
آی کیمی هاله لرین وار
گول چیچیکده ن بزه ننده نه گلین لر کیمی نازین
یئل اسنده او سولاردا نه درین رازی نیازین
اوینایار گوللو قوتازین
تیتره ییر ساز تئلی تک شاخه لرین چایدا چیمنده
یئل او تئللرده گزنده نه کوراوغلو چالی سازین
اورده گین خلوت ائدیب گولده پری لر له چیمنده
قول قاناددان اونا آغ حوله آچار غمزه لی غازین
قیش گئده ر قوی گله یازین
هله نوروز گولو وار قار چیچگی وار گله جکلر
یئل یاغیشدا یویونارکنده گونشله گوله جکلر
اوز لرین تئز سیله جکلر
.........
زوهره ایواندا ایلاهه شینیلینده گورونرکن
باخاسان حافیظی ده اوردا جلالتله گوررسن
نه سئورسن
گاه گوره حافظ شیرازیله ایواندا دوروبلار
گاه گوره ن اورتادا شطرنج قورارکن اوتوروبلار
گاه گوره ن سازیله آوازیله ایلنجه قوروبلار
سانکی ساغر ده ووروبلار
خواجه الهان اوخویاندا هامی ایشده ن دایانیر لار
او نوالرله پریلر گاه اویوب گاه اویانیر لار
........
.......
آمما حیدر بابادا بلدی کی بیز تک هامی داغلار
باغلانیب قول قولا زنجیره بولودلار اودور آغلار
نه بیلیم بلکه طبیعت اوزو نامرده گون آغلار
اگری یوللاری آچارکن دوز اولان قوللاری باغلار
صاف اولان سینه نی داغلار
داغلاری هر نه قوچو جئیرانی طرلانی مارالی
هامی دوشگون هامی یورغون سینه لر داغلی یارالی
گول آچان یئرده سارالی
آمما ظن ائتمه کی داغلار یئنه قالخان اولاجاقدیر
محشر اولماقدادی بونلار داها وولقان اولاجاقدیر
ظولم دونیاسی یانارکن ده تیلیت قان اولاجاقدیر
وای نه طوفان اولاجاقدیر
دئدین آذر ائلی نین بیر یارالی نیسگیلی یم من
نیسگیل اولسامدا گولوم بیر ابدی سئوگیلی یم من
ائل منی آتسادا اوز گولشنیمین بولبولویم من
ائلیمین فارسیجادا دردینی سویلر دیلییم من
حقه دوغرو نه قارانلیق ایسه ائل مشعلی یم من
ابدیت گولویم من
نیسگیل او چرچیه قالسین کی جواهیر نه دی قانمیر
مدنیت ده بین بدویت بیر اوسانمیر
گون گئدیر آز قالا باتسین گئجه سین ده بیر اویانمیر
بیر اوز احوالینا یانمیر
آتار اینسانلیغی آمما یالان انسابی آتانمارز
فیتنه قووزانماسا بیر گون گئجه آسوده یاتانماز
باشی باشلاره چاتانماز
آمما منده ن ساری سن آرخایین اول شانلی سهندیم
ده لی جئیرانلی سهندیم
من داها عرش علا کولگه سی تک باشدا تاجیم وار
الده موسی کیمی فرعونه غنیم بیر آغاجیم وار
حرجیم یوخ فرجیم وار
من علی اوغلویام آزاده لرین مردی مورادی
او قاراتلیقلارا مشعل
او ایشیقلیقلارا هادی
حقه ایمانه مونادی
باشدا سینماز سیپریم الده کوتلمز قیلیجیم وار
